യുഎഇ: പൊതുമാപ്പ് ഉപയോഗപ്പെടുത്തി തുടരാൻ ആഗ്രഹിക്കുന്നവർ ഇനി യുഎഇയി മാനവശേഷി, സ്വദേശിവൽക്കരണ മന്ത്രാലയത്തിൽ നിന്നുള്ള ജോലി അനുമതി (വർക്ക്പെർമിറ്റ്) നിര്ബന്ധമാക്കിയിട്ടുണ്ട്. ഒരു ഓഫർ ലെറ്റർ മാത്രം ആധികാരിക രേഖയായി കണക്കാക്കാൻ സാധിക്കില്ല, വിലസാനുമതി ലഭിക്കാൻ സാധുവായ ജോലിപെർമിറ്റ് ഹാജരാക്കണം എന്ന് ജിഡിആർഎഫ്എ ലഫ്. ജനറൽ മുഹമ്മദ് അഹമ്മദ് അൽ മർറി വ്യക്തമാക്കി. ഇനിയുള്ള കാലത്ത് രാജ്യത്ത് നിയമാനുസൃതമായി തുടരാൻ ഏതെങ്കിലും കമ്പനിയുടെ തൊഴിൽ വിസ നിർബന്ധമാണ്. പൊതുമാപ്പിന്റെ പ്രാധാന്യം കണക്കിലെടുത്ത് അപേക്ഷകർക്ക് പെട്ടെന്ന് വർക്ക്പെർമിറ്റ് നൽകാൻ മന്ത്രാലയം നടപടി സ്വീകരിച്ചുകഴിഞ്ഞു.
ജോലി വാഗ്ദാനം ചെയ്യുന്ന സ്ഥാപനങ്ങൾക്ക് നേരത്തേ തന്നെ തൊഴിലാളിയുടെ പേരിൽ ജോലിപെർമിറ്റ് നേടാൻ സാധിക്കും. അപേക്ഷകന് യുഎഇയിൽ നിയമപ്രകാരം ജോലിയുള്ളത് സ്ഥിരീകരിക്കുന്നതിനാണ് വർക്ക്പെർമിറ്റ് പ്രധാനമായത്. ഈ രേഖ രാജ്യത്ത് താമസിക്കുന്നതിനുള്ള പ്രധാന രേഖ കൂടിയാണ്.
മാനവശേഷി, സ്വദേശിവൽക്കരണ മന്ത്രാലയത്തിന്റെ വെബ്സൈറ്റ്, സ്മാർട്ട് ആപ്ലിക്കേഷൻ, ബിസിനസ് സേവന ഓഫിസുകൾ, ഗാർഹിക തൊഴിലാളികളെ റിക്രൂട്ട് ചെയ്യുന്ന ഓഫിസുകൾ എന്നിവയിലൂടെ വർക്ക്പെർമിറ്റിനായി അപേക്ഷിക്കാം. പെർമിറ്റ് പുതുക്കാനും റദ്ദാക്കാനും ഈ സംവിധാനം ഉപയോഗിക്കാം. അനധികൃത താമസത്തിനുള്ള ശിക്ഷയിലും പിഴയിലും ഇളവ് നൽകിയാണ് പൊതുമാപ്പ് നൽകിയത്.
എന്നാൽ ഈ ആനുകൂല്യം ഉപയോഗിച്ച ശേഷം പുതിയ പെർമിറ്റ് നേടാതെ നിയമലംഘനം തുടർന്നാൽ കടുത്ത ശിക്ഷ നേരിടേണ്ടിവരുമെന്നും അധികൃതർ മുന്നറിയിപ്പ് നൽകി.
കഴിഞ്ഞ നാല് ദിവസത്തിനിടെ നൂറുകണക്കിന് പേർ പൊതുമാപ്പിന്റെ ആനുകൂല്യം പ്രയോജനപ്പെടുത്തിയിരുന്നു .
